Comun di Cjamin dal Tiliment

Ricercje svelte


< vai al contenuto centrale




Il tuo percorso: Tu ti cjatis chi: Comun di Cjamin dal Tiliment > culture > Teatri

Teatri

Il Teatri Comunâl al nas des "cinisis" de sale cinematografiche parochiâl di une volte, fate sù tal prin dopovuere e ative fintremai ai agns ‘70. La Aministrazion Comunâl, dopo vêle comprade, e à proviodût une ristruturazion profonde che i à modificât in maniere sostanziâl il dentri dal stabil, mantignint cuasi intat l'implant volumetric.

teatro

Il Teatri, screât tal mês di Mai dal 1990, al à une piçule jentrade che e puarte te sale indulà che a son 236 puest par sentâsi. Cheste struture e je, par solit, doprade des diviersis associazions locâls e des istituzions scolastichis par meti in sene rapresentazions teatrâls, e ancje di compagniis e grups teatrâls amatoriâls di altris Comuns. 

La Aministrazion Comunâl, cun di plui di inmaneâ par cont so vie pal an diviers spetacui (soredut par furlan) e concierts, dal 1996 e colabore cul Comun di Codroip pe organizazion  di une stagjon di Prose che si davuelç a Cjamin dal Tiliment, a Codroip (Teatri Verdi) e a Listize. Cheste colaborazion (che e cjape dentri ancje l'Ent Regjonâl Teatrâl dal Friûl Vignesie Julie) e à ufiert la pussibilitât di puartâ a Cjamin spetacui di nivel nazionâl e atôrs de vualece di Piera Degli Esposti, Lauretta Masiero, Nino Castelnuovo, Arnoldo Foà, Giuseppe Cederna, Franca Valeri, Valeria Valeri, Mario Pirovano, Lucia Poli, Amanda Sandrelli, Roberto Herlitzka.

Ente Regionale Teatrale del Friuli Venezia Giulia

teatro

Il teatri di Cjamin al da acet ancje a apontaments conciertistics, cemût che a son, par esempli, "Musica Friuli" (une schirie di apontaments musicâi che si davuelzin vie pal an, e di un precîs di Març a Dicembar, che a cjapin dentri cun di plui di Cjamin dal Tiliment ancje tancj altris comuns de provincie di Udin) in cheste ocasion si esibissin musiciscj che a presentin tescj di autôrs furlans, cuntune atenzion particolâr ae produzion plui resinte. Un mût par afermâ la alte cualitât e la bravure dai artiscj locâi in cjamp musicâl e par ufrî a un public une vore larc la oportunitât di scoltâ cualchi interprete jenfri i plui interessants dal panorame furlan.