Comun di Cjamin dal Tiliment

Ricercje svelte


< vai al contenuto centrale




Il tuo percorso: Tu ti cjatis chi: Comun di Cjamin dal Tiliment > Turisim > Itineraris > Tai lûcs di Ippolito Nievo

Tai lûcs di Ippolito Nievo

Chest itinerari al propon une leture dai valôrs ambientâi e culturâi dal teritori di Cjamin dal Tiliment, daûr chê che e je une olme tematiche leade al scritôr romantic Ippolito Nievo (1831- 1861). Tancj aspiets e cjamps descrits di lui si puedin ancjemò passâ e a son ancjemò ricondusibii almancul tai trats essenziâi.

L'itinerari

villa

Il percors al scomence a Guriz, indulà che si cjate un complès impuartant di rilêf storic e artistic, che al è la Vile Colorêt - Mels, cu la sô gleseute, che e je sul scomençâ de vie par Cjamin. Il poete furlan Ermes di Colorêt (1622- 1692), un dai avons di Nievo pe bande di mari, al jere particolarmentri afezionât a cheste dimore, e nus à lassât viers plens di amirazion pe bielece dal parc che si slargje daûr cheste vile. Nievo al ricuarde lis sôs permanencis in chest edifici, ospit di Elisabete di Colorêt, sûr de none materne, e di so fi Ermes Mainardi, che al nudrive sintiments patriotics tant che lui.

borc

Di culì il scritôr si dislontanave par lungjis cjaminadis ator, tal teritori dominât dal flum Var, fermantsi te aree a lunc e tant vulintîr, cemût che o savìn di diviersis sôs letaris.

Lant indenant in direzion dal cjâf lûc Cjamin dal Tiliment, l’itinerari al ponte l'atenzion su doi ponts: il "borc dai siôrs", vuê vie Tiliment, indulà che tal n.19 al viveve Antonio Giavedoni, aministradôr dai bens di Nievo, so confident e amì. Al reste ancjemò lo steme dai Giavedoni, che al rapresente propit un ’gjavedòn’, chel pes di flum, che Nievo al ferme la sô atenzion te conte "Il Varmo", cjapant in zîr la femine dal mulinâr, Polonia, che e jere une vore golose.

Al è po dopo il municipi vecjo, edifici che al merete di jessi viodût. Fermìnsi cumò dongje, dilunc la vie che e puarte a Plêf, indulà che o vin voie di segnalâ un afresc popolâr su mûr, che al à une imagjine de Madone che e ricuarde chê de Plêf antighe, ancje chê nomenade di bande di Nievo, che la ricuarde te "Il Varmo" e che al veve scomençât une conte dedeât a chest ma che al è restât interot.

Tornìn cumò a Cjamin, par cjapâ la vie curte che e puarte al mulin antic di Glaunic, che al è leât ae part fondamentâl de storie contade ta "Il Varmo"; in dì di vuê ce che al reste al è metût dentri di un ristorant, che al vuarde zelosamentri, e cun orgoi, i ricuarts leteraris che lu àn rindût un mulin famôs.

Pôcs metris plui indenant, dilunc un dai plui biei trats dal Var, su la strade che e puarte viers Gridiscjute, si cjate un puntut che, al dîs Nievo, al sdrumave jù dispès sot la violence dal Var.

clicca per allargare

Fasìn ancjemò cualchi decenis di metris, li de confluence dal flum Marzia cul Var, si cjatìn denant di un paisaç naturâl une vore biel. Al è pussibil che la imagjine dal "lûc biel" di Nievo, indulà che i doi fruts dal mulin di Glaunic a lavin a zuiâ, sintìnsi striâts de magjie de nature, e sedi stade sugjeride di chest spieli di aghe e di vert. Il percors al va indenant tal comun di Vildivar. In particolâr li de localitât Mulin di Gridiscjute e Priorât. Tai lûcs di Ippolito Nievo al è gjavât fûr de vuide piçule "Itinerari Nieviani del Friuli", di Emilia Mirmina.

Notis sul Teritori

La aree che e je a sud di Codroip,siore di vilis e di borcs storics, di mulins e di aghe di risultive, e je stade une mete di viaçs frecuents di bande dal scritôr Ippolito Nievo, inmagât, no dome de presince di amîs e di parincj che a vivevin in chescj paîs, ma soredut de bielece dai lûcs e dal paisaç. Lis sôs impressions, metudis par iscrit in cetantis letaris mandadis ai siei corispondents, a son stadis po dopo voltadis in imagjinis leteraris ricuardadis dai preseadôrs des sôs oparis, in particolâr de novele "Il Var" e dal romanç "Lis Confessions di un talian".

La sô atenzion e je indreçade soredut ai paisaçs di flum, il Var e il Tiliment, ae mobilitât dal element de aghe che al da vite al cidin e ae  imobilitât de campagne; ma lu inmagavin ancje lis vilis dai siôrs e la vite semplice dai contadins. A restin ancjemò tancj elements di valôr di chel paisaç dal Votcent, e alore un percors in chest teritori che al vuarde chestis testemoneancis dal passât al pues deventâ une ocasion par scuviertis plasevulis.