Comun di Cjamin dal Tiliment

Ricercje svelte


< vai al contenuto centrale




Il tuo percorso: Tu ti cjatis chi: Comun di Cjamin dal Tiliment > Il Paîs > Storie

Storie

La origjine storiche dal teritori Comunâl di Cjamin dal Tiliment si cjate par sigûr   te aree di Plêf, cognossude dal pont di viste archeologjic pe presince di une piere miliâr che e va indaûr fintremai ae vie cognossude tant che "PER COMPENDIUM", fate sù cun dute probabilitât ator dal 2-1 sec. prime di Crist, che e unive in maniere direte la colonie Romane Julie Concuardie cui paîs Norici, di mût di vuardâsi dal passâ par Aquilee.

Rilêfs fats tal mês di Lui dal 1997 di bande de Universitât di Triest a àn sigurât la presince di tocs diferents di crep che a van indaûr ae ete protostoriche, in gjenerâl insuazâts jenfri il Bronç di Mieç e il Bronç resint, indizi verosimil de presince di une aree di passaç ancjemò tal dì di vuê imprecisabile par ce che al rivuarde la estension e la funzion prime dal imperi di Rome.

E je clare la impuartance logjistiche di <stong>Rose vie pe epoche Romane e Medievâl, viodût che la arterie stradâl (par Compendium) che di Concuardie, passant par Cintiel (localitât a est di Puart) e Cordovât, e rivave fintremai al  cors dal Tiliment e cun di plui la plêf in cuistion. Rose e jere duncje viodude tant che "pueste stradâl" e lûc di polse e puest di ristorazion pai cetancj che a passavin il flum; al è facil duncje intuî il flus costant di oms e di marcjanziis che al rivuardave in maniere direte dut il teritori di Cjamin, percors fis de "par Compendium" par un lunc periodi di timp, cemût che al è testemoneât dal miliâr datât jenfri il 293 e il 305 daspò di Crist, che al ateste un restaur sucessîf de arterie stradâl. Cheste circolazion e à favorît une presince simpri plui grande di grups insediatîfs in chescj lûcs, favorîts di un teren favorevul dal pont di viste idrografic.

Il rapuart cul Tiliment al è stât un fîl dal discors te storie di Rose e de aree che e vanze e che tal dì di vuê e fâs part dal Comun di Cjamin dal Tiliment; no stin fevelant dome di inondazions, di straripaments o di distruzions ma dal mudament de posizion dal flum vie pai secui, che dut câs al à lassât cemût che e jere la sô peculiaritât principâl, ven a stâi, la diramazion. Di fat il cors al jere ugnul fintremai a Plêf, po dopo si divideve in doi ramaçs che a lavin a finî tes lagunis dal Adriatic Alt. Chest al marche la posizion ideâl di Rose, pont critic indulà passâ il vât dal flum cence scugnî scjavaçâ un cors di aghe dopli.

De ete antighe ae ete di Mieç, fintremai ae storie resinte, la muse economiche di chest teritori si fonde, par la plui part, su lis pratichis de agriculture, indreçadis a un paisaç antropic caraterizât di cjasis modestis di contadins metudis dongje in piçui grups contornâts di cjamps coltivâts. Chest isolament al vignive interot des vôs che a rivavin de strade grande,  considerade “coriere dai manufats” e gnovis che a vegnin dal mont di fûr. E di fat al è propit dal carateristic percors stradâl che al cjate la sô origjine il non Cjamin, cemût che al è testemoneât di ricercjis comparadis e sveltis.

L’apelatîf al va indaûr al periodi imperiâl tart e ae ete di Mieç, cussì come San Vidot e Rose, ducj i doi de ete di Mieç. Bugnins e cun dute probabilitât ancje Glaunic a condusin a insediaments che a son precedents ae etât Romane, di fat si crot di provignince Slave, cussì come par Stracis, toponim di un comun de aree Gurizane, e Guriz, forme diminutive dal Slâf Guriz(a), ven a stâi culine.

La reson storiche di cheste sovraposizion toponomastiche si à di cirî te avanzade e te ritirade dal flum vie pai secui, che di fat a àn causionât la regression o il progrès de coltive, e ancje lis iniziativis insediativis des comunitâts locâls, svicinadis, rinfuarçadis o sostituidis (indulà che a jerin dai puescj vueits o indulà che si voleve creâ dai gnûfs), di grups di provignince diferente, in particolâr des comunitâts Slavis, distribuidis in maniere omogjenie ben plui in là dai arzins e dai glereâls dal cors di aghe, cemût che a testemonein provis archeologjichis siguris, tal câs di Pordenon, e di presincis di altri gjenar tal comprensori di Sest e di Sanvît, e plui in là dal Livence, tal Trevisan.