Comun di Cjamin dal Tiliment

Ricercje svelte


< vai al contenuto centrale




Il tuo percorso: Tu ti cjatis chi: Comun di Cjamin dal Tiliment > Il Paîs > Borcs Rurâi

Borcs Rurai

foto borgo

Tal teritori, tancj a son i borcs rurâi ancjemò intats, platâts intun paisaç agricul, siôr di vert e di aghis, indulà che si puedin lei i caratars insediatîfs e chei architetonics, tipics de civiltât contadine.

I borcs, cenglâts de campagne, si svilupin dulinvie de strade, presentant une curtine edilizie continue a fîl de stesse, cun puartons di acès ai curtîi internis e ai fabricâts agricui.

Di particolâr interès a son lis muraduris di claps, alternâts cuntune cierte distance dai modons; gjeometrie une vore doprade, viodude la presince di claps tal glereâl dal flum Tiliment.

foto borgo

Al risulte une vore sugjestîf fâ une visite a Guriz, indulà che il  borc al fo fat sù ator de Vile Colorêt-Mels, che e va indaûr ae fin dal secul XVI sec. e che fo costruide te aree indulà che al jere un fuartin antîc, cenglât cuntune campagne di rôi secolârs; a Cjamin dal Tiliment, di grant interès al è il "borc dai siôrs", che si disvilupe dilunc vie Tiliment, cun palaçs e residencis che a jerin di proprietât di fameis sioris.

Lis corts dai edificis si vierzin sui cjamps e su lis rivis dal Var; la frazion di Glaunic si disvilupe dilunc la arterie principâl, che si caraterize par vê i edificis di claps e par i siei tipics portons, e pe gleseute cenglade di cjasutis, cul flum Var che al siere il borc te bande a nord.

E ven daûr la frazion di Bugnins, dongje dal flum Tiliment, ubicade tal mieç di roiis numerosis. Chi si cjatin doi borcs: Bugnins vecjo e Bugnins gnûf; il prin al è plaçât dilunc la strade che e puarte a Belgrât, il secont, invezit, si caraterize di un nucli isolât, cun pocjis cjasis propit dongje dal arzin dal flum Tiliment.
Parimentri sugjestive e je la visite dai rustics dongje de roie Bugnins, cu l'edifici de latarie, un timp che al funzionave, cu lis ruedis metude in vore de aghe de roie.

A nord di Cjamin dal Tiliment si cjate San Vidot, scjavaçât dal flum Var che al separe l’abitât in doi. L’implant urban al è diviers rispiet a chei altris, indulà che i edificis disponûts ator de glesie o a arc dilunc lis stradis internis, e i mûrs dai edificis stes a son, pe grant part, fâts sù cui claps, e cul porton che al permet l'acès ai curtîi interni.

Lant viers Vildivar si cjate il borc di Stracis, ancje chel dongje dal flum Tiliment, cun edificis che a son dilunc la strade, jenfri chescj al risalte Palaç Luccardi, che al va indaûr al Cinccent, cun mudaments in stîl neogotic dal secul XIX.

A son borcs rurâi cuasi intats, cun cjampanii che si drecin sù te campagne dulintor, fissant i segnâi di une vite contadine fate di fadie, in stret rapuart cul flum Tiliment.